Unordered List

05 ஏப்ரல் 2021

மெஷின் கன்னும் கொடிபறக்கும் காரும்

நீங்கள் காரில் சென்றுகொண்டிருக்கும்ப்போது மெஷின்கன்னுடன் ஒருவர் வழியை மறித்து நிறுத்தச்சொன்னால் எப்படி இருக்கும், நின்றவுடன் இன்னும் நாலுபேர் நம் காரை நோக்கி வந்தால்? நீங்கள் எப்படி சமாளிப்பீர்கள் என்று தெரியவிலை ஆனால் சென்ற வாரத்தில் மட்டும் மூன்று முறைக்குமேல் இந்த சூழ்நிலையை எளிதாகக் கையாண்டேன் என்பதை இங்கே சொல்லிக்கொள்கிறேன்.

மெஷின்கன்னுடன் இருபவர் பொதுவாக தமிழ்தெரியாத துணைராணுவ வீரர் என நினைகிறேன். உடனே ஒரு போலீஸ், ஒருவர் கேமராவுடன் என காரை சோதனை செய்கிறார்கள். தேர்தலுக்கான ஏற்பாடு அது. எத்தனையோ அரசியல்வாதிகள் பெரிய பெரிய கார்களில் செல்வார்கள், இதில் நம்மைப் போய் சோதனை செய்கிறார்களே என கொஞ்சம் யோசித்தேன், அப்போது தான் ஒன்றை கவனிக்கமுடிந்தது. சாலையில் செல்லும் கார்களில், பிரச்சார வாகனங்கள் தவிர எதிலுமே கட்சிக்கொடிகள் இல்லை. 


இந்த தேர்தல் சமயத்தில் பொதுமக்களான நம்மை விட  கட்சியினர் தீவிர தான் பயணங்களில் இருப்பார்கள் கொடிகளோ, கொடிகள் கட்டக்கூடாது என ஏதாவது விதி இருந்தாலும் கட்சி அடையாளாத்தை வெளியில் காட்டிக்கொள்ளும் எந்த விஷயமும் இல்லாமல் பயணம் செய்வதால் வித்தியாசம் தெரியவில்லை.

இது தேர்தல் சமயம் என்பதால் என் நண்பர் ஒருவர் சொன்னது நினைவுக்கு வருகிறது. எங்கள் எம் எல் ஏ தேர்தல் சமயத்தில் தான் தென்படுவார்,  பிறகு அடுத்த தேர்தல் சமயத்தில் தான் பார்க்கமுடியும் என என் நண்பர் ஒருவர் சொன்னார், அப்படியா மிக நல்லவராக இருக்கிராரே என்றேன், பிறகுதான் தெரிந்தது நண்பர் அதை ஒரு விமர்சனமாக சொல்லி இருக்கிறார் என்பது. ஆனால் அப்படி ஒரு வேட்பாளர்,அதாவது ஜெயித்தபிறகு தான் இருப்பதையே காட்டிக்கொள்ள மாட்டேன், என வாக்குறுதி கொடுத்தால் அவருக்கே ஓட்டுப்போட பெரும்பாலான மக்கள் விரும்புவார்கள் என்பதே உண்மை.

பொதுமக்களான நமது எதிர்பார்ப்பு என்ன? நமக்குத் தேவையான அனைத்தும் அந்தந்த அரசு அலுவகக்ஙள் வழியாக இயல்பாக நடக்கவேண்டும் என்பது தானே. ஒரு மாநகராட்சி அலுவகத்துக்கோ, தாலுகா ஆபீஸுக்கோ அல்லது ஏதோ ஒரு எதிர்பாரத காரணங்கத்துக்காக போலீஸ் ஸ்டேஷனுக்கோ நீங்கள் செல்லும்போது அங்கு எந்த தலையீடும் இன்றி உங்களுக்கான சேவை கிடைப்பது தானே நீங்கள் எதிர்பார்ப்பாக இருக்கமுடியும். 

எம் எல் ஏ உட்பட அரசியல் கட்சியில் இருக்கும் மக்கள் பிரதிநிதிகளின் சேவையை குறைத்து மதிப்பிடவில்லை. அவர்கள் சிறப்பாக செயல்படுகிறார்கள் என்பதற்கு அடையாளம் அவர்கள் தொகுதியில் அரசியல்வாதிகள் தலையீடு இல்லாமல் நாம் அரசு அலுவலங்கள் செல்லமுடியும் என்ற நம்பிக்கையைத் தருவது தான். அதாவது அவர்கள் ஜெயித்தபின்னரும் தீவிர்மாக அரசியல் பயணம் செய்யவ்வேண்டும், ஆனால் கொடிகட்டிக்கொள்ளாமல்.

தேர்தல் சமயத்தில் எல்லாக் கட்சிகளும் மிக தீவிரமாக செயல்படுறார்கள். நம்மை விட அவர்கள் கார்கள் தான் சாலைகளில் பயணம் செய்கிறது ஆனால் அவர்கள் அரசியல்வாதிகள் என்று காட்டிக்கொள்ளாமல் பயணிக்கிறார்கள். தேர்தல் முடிவுகள் வந்தபின்னரும் மக்கள் பிரதிநிதிகள் கொடியில்லாத கார்கள் போல சிறப்பாக பயணித்து அரசை சிறப்பாக்கி மக்களுக்கு நன்மை செய்யவேண்டும் என்பதே மக்கள் எதிர்பார்ப்பு

28 மார்ச் 2021

ஓட்டு யாருக்கு

பிடித்த நடிகர் படம் என்றால் முதல் நாள் பார்த்து அதையும் பேஸ்புக்ல ஸ்டேடஸ் வைக்கிற ஆளுதானே, அரசியல் ஆதரவு ஸ்டேடஸ் வைத்தால் மட்டும் என்ன பிரச்சனை என்று என்று கேட்கிறார்கள் சில நண்பர்கள். நம் வீட்டுக் குழந்தைகள் சினிமா பாடல்கள் எல்லாம் பார்க்கத்தானே செய்கிறார்கள், அப்படியே அவர்கள் அரசிலையும் ஆதரித்தால் என்ன என்றும் கேட்கிறார்கள். இன்னும் சொல்லப்போனால் சோஷியல் மீடியாவில் ரசிக விவாதம் செய்பவர்கள் பொறுப்பற்ற தற்குறிகளாகவும் அரசியல் சண்டை போடுபவர்கள் பொறுப்பான அறிவுஜீவிகளாவும் பார்க்கப்படுவதாகவும் தெரிகிறது

சரி, என்ன வித்தியாசம் என்று பார்க்கலாம்.

சின்ன வயதில் க்ரிக்கெட் பார்க்கும்போது சொல்வார்கள், நீ க்ரிக்கெட் பார்த்து டைம் வேஸ்ட் பண்ணிட்டு இருக்க, அங்க சச்சின் விளையாடி கோடி கோடியா சம்பாரிக்கிறான் என. எனக்கு க்ரிக்கெட் பார்க்கபிடிக்கிறது அதனால் பார்க்கிறேன், சச்சின் பணக்காரராக இருப்பதில் எனக்கு பொறாமை ஏதும் இல்லை என்று நினைத்துக்கொள்வேன். 

சினிமாவுக்கும் இது பொருந்தும். இப்போ கூட கேட்கிறார்கள், நீ டிக்கெட் வாங்கி படம் பார்த்து நடிகர்கள் கோடி கோடியா சம்பாதிக்கிறார்களே என்று. நான் கவனிப்பது அந்த டிக்கெட் பணம் கஷ்டப்படாமல் செலவளிக்கமுடிகிறதா மற்றும் க்ரிக்கெடோ சினிமாவோ பார்க்க நன்றாக இருக்கிறதா என்பது மட்டுமே.  அவர்கள் சம்பாதிப்பதில் நமக்கு கமிஷன் கிடைக்கிறதா என்று அல்ல. 

ஆனால் அரசியல் கட்சி ஆதரவு நிலையே வேறு, அங்கு ஆதரவளிப்பவர்களுக்கு பணம் கொடுப்படுகிறது என்பது கிட்டத்தட்ட எல்லோருக்கும் தெரிந்த ரகசியமாக இருக்கிறது. நேரடியாக ஓட்டுக்குப் பணம் என்பதைத்தாண்டி தேர்தல் அறிக்கைகளில் பணம் என்பதும் புதிய இயல்பாக இருக்கிறது.

ஆனால் அரசியலில் முக்கிய பிரச்சனை பணமாக கொடுக்கப்படுவது அல்ல, அதைவிட முக்கிய பிரச்சனை அதிகாரமாகவும் செல்வாக்காகவும் கொடுக்கப்படுவது. தான் ஆதரிக்கும் கட்சி அதிகாரத்துக்கு வந்தால் அதற்குக் கிடைக்கும் அதிகாரத்தில் தனக்கும் பங்கு இருக்கிறது என்ற நம்பிக்கை பலருக்கும் இருப்பதை கவனிக்க முடிகிறது.

நீங்கள் ரஜினி அல்லது விஜயின் சினிமாவை பார்த்தாலோ அல்லது கோலி ரோஹித் ரசிக சண்டை போட்டாலோ அவர்களின் வருமானமோ அல்லது சொல்வாக்கோ உங்களுக்கு கிடைக்கப்போவதில்லை. ஆனால் அரசியலில் அந்த வாய்ப்பு என்றும் இருக்கிறது. சினிமா ரசிகர்களிலும் சிலர் மன்றப் பொறுப்பாளார்களாக இருப்பவர்கள் பொதுமக்கள் அல்ல, அவர்கள் கட்சி நிர்வாகிகள் போலத்தான்.

மார்கெட்டிங்கில் ஒரு விஷயம் இருக்கிறது.இன்னொருவர் நமக்கு நேரடியாக உதவுவது எளிது ஆனால் நமக்காக பிறரிடம் பேசுவது கடினம்,

உங்கள் நெருங்கிய நண்பரிடம் பணம் உதவியாகக் கேட்டால் கூட தந்துவிடுவார்கள். ஆனால் உங்களுக்காக ஒன்னொருவரிடம் பேசவேண்டும் என்று அழைத்தால் பலர் தவிர்த்துவிடுவர். நீங்கள் தயாரிக்கும் பொருளை உங்கள் நண்பரிடம் வாங்கச்சொன்னால் பணம் கொடுத்துக்கூட வாங்கிவிடுவார், ஆனால் இன்னொருவருக்கு பரிந்துரைக்கச் சொன்னால் தயங்குவார், இரண்டாவதில் அவருக்கு செலவு இல்லை என்றால் கூட.

ஏன் என்றால் இங்கு அவர்களில் ரெபுடேஷன் கவனிக்கப்படுகிறது. அதை பணயம் வைக்கும் அளவுக்கு நாம் வெர்த்தா என்ற கேள்வி தான் முதலில் எழும்.  ஆனால் அரசியல் விஷயத்தில் நம் மக்கள் மிக எளிதாக தங்கள் ரெபுடேஷனை பணயம் வைத்து பிரச்சாரத்தில் இறங்குவதுதான் ஆச்சர்யமானது.

ஆனால் இதிலும் ஒரு விதிவிலக்கு உண்டு. அரசியலை பொதுமக்களாக பார்பதற்கும் அரசியல் கட்சியில் வெளிப்படையாக தங்களை இணைத்துகொள்வதற்கும் வித்தியாசம் இருக்க்கிறது. அப்படி இணைத்துக்கொண்டவர்கள், கட்சியில் தங்களது செல்வாக்கை விசுவாசத்தை வெளிப்படையாக முன்வைப்பவர்களுக்கு நண்பர்களிடம் ஓட்டுக்கேட்க முழு உரிமை இருக்கிறது. அவர்கள் மீது நமக்கு எந்த விமர்சனமும் இல்லை. தான் தொண்டராக இருக்கும் கட்சிக்காக ஒருவர் ஓட்டுக்கேட்பது மிக நேர்மையானது.

அப்போ பொதுமக்களின் அரசியல் ஆதரவு நிலைப்பாடு தவறா, நட்ட நடுநிலைதான் சரியா என்று கேட்கலாம், அப்படியல்ல. நானும் இந்த தேர்ததில் ஓட்டுப்போடுவேன், எதற்கு அப்படி போடுகிறேன் என்பதற்கான காரணமும் என்னிடம் உண்டு ஆனால் அதை பொதுவெளியில் பிரச்சாரமாக வைக்கமுடியாது என்பது மட்டுமே எனது கருத்து.

தேர்தல் சமயத்தில் பணம் வாங்கும் எளிய மக்களை குறைசொலவது எளிது. ஆனால் கட்சிகளால் செல்வாக்காகவோ அதிகாரமாகவோ நமக்கு ஒரு கட்சியால் பலன் கிடைக்கும் என்று பிரச்சாரம் செய்வதும் பணம் வாங்குவதற்கு குறைவானதல்ல என்பதை மட்டும் நினைவில் வைப்பது நல்லது.

21 பிப்ரவரி 2021

ஒரு அதிசயம், ஜெயிச்சமேட்ச் ரிவியூ

இரண்டாவது டெஸ்ட் மேட்ச் ஜெயிச்சாச்சே, அதுக்கு எங்கே ரிவியூ என மக்கள் கேட்டுக்கொண்டதால், அந்த மேட்ச் பற்றி நம்ம வியூ இங்கே

பொதுவா விளையாட்டுகளே ஹீரோக்களால் ஆனது தான். இந்த மேட்ச்ல ஹீரோக்கள் பலபேர் இருந்தாலும் ஒருத்தரோட முகம் மட்டும் முதன்மையா நிற்கிறது. முதல் இன்னிங்சில் 150 ரன்னுக்கு மேலே எடுத்து ஒரு சாலிட் ஸ்கோர்  உருவாக்கிய ரோஹித் சர்மா சூப்பர் தான், ஆனால்  செகண்ட் இன்னிங்சில் அவ்வளவு கஷ்டமான பிட்ச் கண்டிஷன்ல விராட் கோலி இன்னிங்ஸ் அதை விட ஸ்டைலா இருந்தது, அவர் அப்படினா 5 விக்கெட்டும் எடுத்துட்டு அதே செகண்ட் இன்னிங்சில் சென்சுரி போட்ட அஸ்வின்  என்ன சாதாரணமா, இவங்க எல்லாரும் இந்த மேட்ச் விட ஹீரோக்கள்தான் இருந்தாலும்  அந்த மேட்ச்ல் மனதில் நிற்கும் முகம் என்றால் அது முகமத் சிராஜ்.


அஸ்வின் சென்சுரி அடித்தபோது அஸ்வினுக்கு சமமாகவே, சொல்லப்போனால் அதைவிட அதிகம் கொண்டாடியது முமகது சிராஜ், அது கொஞ்சம் வேடிக்கையாகக்கூட தோன்றியது, ஆனால் அந்த செஞ்சுரி அவனுடையதும் தான்.


மகிழ்ச்சி... முகமது சிராஜ்



கொஞ்சம் ரன் எடுத்து நானூறுக்குப் பக்கத்தில் கொண்டுவந்துவிட்டால் இந்தியாவின் வெற்றி உறுதி என்ற நிலையில் தனது இரண்டாவது இன்னிங்ஸை ஆரம்பித்தது இந்திய அணி. நமது பேட்ஸ்மேன்கள் இந்த பிட்சை சமாளிக்கமுடியாமல் அடுத்தது அவுட் ஆக, விராத் கோலி தான் ஏன் ஒரு மாஸ்டர் பேட்ஸ்மேன் என தனது நிதானமான மற்றும் ஸ்டைலான ஆட்டத்தால் காட்டினார், சரிந்துகொண்டிருந்த மறுமுனையை அஸ்வின் நிலை நிறுத்தினார். 


ஃபிப்டி அடித்து விராட் அவுட் ஆகும்போதே அது ஒரு ஜெயிக்கக்கூடிய ஸ்கோர் தான். அப்படியே டிக்ளேர் செய்திருந்தால் இந்தியா ஜெயிப்பதோடு தானும் டாப் ஸ்கோரில் இருந்திருக்கலாம். ராகுல் ட்ராவிட் போன்ற ஒரு கேப்டன் இருந்திருந்தால் டிக்ளேர் செய்திருப்பாரோ என்னவோ ஆனால் கோலி டிக்ளேர் செய்யாததற்குக் காரணம் அஸ்வினுக்கு இருந்த செஞ்சுரி வாய்ப்பு.


நல்லவேளையா ட்ராவிட் கேப்டன் இல்லை :)


எட்டாவது விக்கெட்டில் இருந்த இஸாந்த் சர்மா ஃபோர், சிக்ஸர் என தேவையில்லாமல் சுற்றி அவுட் ஆனார், கடைசி பேட்ஸ்மேனாக வந்த சிராஜ் செய்தது ஆச்சர்யம்.


மிக தன்னம்பிக்கையுடன் விளையாடிய அவர் எந்த ரிஸ்கும் எடுக்கவில்லை, இங்கிலாந்தின் மிகச்சிறந்த பந்துவீச்சை மிக எச்சரிக்கையாக கையாண்டார். ஒவ்வொரு பந்தையும் அவர் டெபென்ஸ் விளையாடியபோது சென்னை கூட்டம் ஆராவாரித்து மகிழ்ந்தது. அவர் செய்வதின் அருமையை உணர்ந்த கூட்டம் அது.


நிலைமையை உணர்ந்த அஸ்வினும் தனது வாய்ப்பில் வேகமாக சிக்ஸர் ஃபோர் என மிக விரைவாகவே செஞ்சிரி அடித்தார். அந்த வெற்றி அஸ்வினுக்கு உரியது என்றாலும் முகமது சிராஜுக்கும் ஒரு மகிழ்ச்சியான பங்கு இருக்கிறது.


இந்த செஞ்சுரியில் சிராஜ் பங்குபோலவே, அஸ்வினின் சமீபத்திய வெற்றிகளில் அவரது யுடியூப் சேனலுக்கும் பெரிய பங்கு இருக்கிறத. அது அஸ்வினுக்கு ஒரு 'நல்ல' பேட்டிங் பார்ட்னர் கொடுக்கும் நம்பிக்கையை கொடுக்கிறது என்றே தோன்றுகிறது


ஐபியல் போன்ற ஒரு பரபரப்பான டோர்னமன்ட் நடக்கும் சமயத்தில் அஸ்வின் யுடியூபில் கருத்து பேசிக்கொண்டிருப்பது பெரிய ரிஸ்க்காக பார்க்கப்பட்டது. கடும் விமர்சனங்கள் கூட வந்தன.


கருத்து மாஸ்டர் அஸ்வின்



ஆனால் அதன் பின்னர் அவரது தன்னம்பிக்கை இன்னும் வளர்ந்ததை கவனிக்க முடிகிறது.பைனல் வரை வந்த  மிகச்சிறப்பான ஐபில், ஆஸ்திரேலியாவில் அதிரடி என்ற வளர்ந்து இப்போது சென்னையில் விஸ்வரூபம் எடுத்திருக்கிறார். அணியினரின் நம்பிக்கையும் பெற்றிருக்கிறார்.


இதனால் உலகம் அறியும் நீதி என்னவென்றால், கருத்து என்று ஒன்றிருந்தால் அதை சொல்பவனே ரியல் மாஸ்டர்.






கோலி காலியா? - சென்னை டெஸ்ட் ரிவியூ


09 பிப்ரவரி 2021

கோலி காலியா? - சென்னை டெஸ்ட் ரிவியூ

நம்ம தளத்தில் ரிவியூ வரலையே என பல அன்பர்கள் கேட்டுக்கொண்டதால் சுடச்சுட ஒரு கிரிக்கெட் ரிவியூ.

நாம் வழக்கமாக கிரிக்கெட் ரிவியூ செய்வதில்லை, எனவே எப்படி செய்வது என சின்ன யோசனை, சரிதான் என வகைக்கொன்றாக எல்லா வகை ரிவியூவும் செய்துவிடலாம் என இறங்கிவிட்டோம்.


அறிவுஜீவி ரிவியூ

நடுநிலை அறிவுஜீவிகள் என்ன செய்யவேண்டும் என்பதில் ஒரு முக்கிய அம்சம் இருக்கிறது, அதை மட்டும் சரியாகச் செய்தால் ஸ்கோர் செய்துவிடலாம். அதாவது எந்தத் துறை எடுத்தாலும் அதில் முதன்மையாக இருப்பவரை மக்களுக்குப் பிடிக்கும், இயல்பாக அவர் மிகத் திறமையானவராக இருப்பார். இருந்தாலும் மக்களுக்குப் பிடிப்பதை நாமும் சொன்னால் எப்படி நடுநிலை ஸ்டாம்ப் கிடைக்கும், எனவே அவர்களை எப்போதும் திட்ட முடியாவிட்டாலும் சான்ஸ் கிடைக்கும்போதெல்லாம் தட்டிவைக்கவேண்டும்.

இளையராஜா நல்ல இசையமைப்பாளார் தான் இருந்தாலும் அவர் கொஞ்சம் நாம் சொல்றபடி நடக்கப்பழகினால் நல்லா இருக்கும், ஹூம், என்ற தொனியில் எழுதினால் ஒரு அறிவுஜீவி தோரணை வந்துவிடும். 

இது க்ரிக்கெட் என்பதால் கோலிக்கு ஒரு அட்வைஸ். சரி. கோலி நல்ல பேட்ஸ்மேன் தான், ஆனால் அவரை நம்பியா ஒரு டீம் இருப்பது, அவர் டீமில் இல்லாமல் இருந்தால் மற்றவர்கள் நல்லா விளையாட ஒரு வாய்ப்பு கிடைக்கிறது பாருங்கள். எனவே கோலியை அடுத்தமேட்சில் தூக்கினால் சிறப்பா இருக்கும் என எழுதினால் ஒரு அறிவுஜீவி ரிவியூ ரெடி.


நல்லியில்பு ரிவியூ

யாரை சப்போர்ட் செய்தால் நமக்கு ஒரு நல்ல நல்லியல்பு இமேஜ் கிடைக்கும் என்பதை யோசிக்கனும். விராட் கோலியையோ அல்லது சச்சினையோ சப்போர்ட் செய்தால் அவர்கள் தொடர்ந்து ஜெயித்து பல கோடிகளை சம்பாதிச்சிட்டு போயுடுவாங்க, அதில் நமக்கு என்ன இருக்கிறது. 

அதனால் இருப்பதிலேயே பரிதாபமான, ஜெயிக்க வாய்ப்பில்லாத ஒருவரை தேர்ந்தடுக்கவேண்டும். 

கேப்டன்சிய நம்ம ரஹானேட்ட கொடுத்துட்டா சிறப்பா இருக்குமே என ஒரு பிட்டைப் போட்டு வைக்கலாம். இதில் தவறி ரோஹித் பெயரைச் சொல்வதில் ஆபத்து இருக்கிறது, அவன் டெஸ்ட் இல்லாவிட்டாலும் டி20 மேட்சிலாவது ஜெயித்துவிடுவான். ஜெயிப்பவனை ஆதரிப்பதில் என்ன நல்லியல்பு இருக்கு சொல்லுங்கள்.

இப்போது நம்ம நல்லியில்பு ரிவியூவர்ஸ் ஆதரிப்பதற்காகவே அளவெடுத்து செய்தவர் தான் ரஹானே. அவரை கேப்டனாக ஆக்குங்கள் என்று சொல்வதில் நம்ம இமேஜ் எகிற வாய்ப்பிருக்கிறது.

அவ்வளவு சேலஞ்சிங்கான இரண்டாவது இன்னிங்ஸில் கோலி அடித்த அரை சதத்தையோ, நாம் சப்போர்ட் செய்யும் ரஹானே முதல் இன்னிங்கில் ஒரு ரன் இரண்டாவது இன்னிங்கிஸ் முதல் பாலில் எல்.பி.டபிளயூ தப்பித்து அடுத்த பந்திலேயே ஸ்டம்ப் இழந்து பரிதாபமா முட்டையில் அவுட் ஆனதோ நினைவில் வைத்துக்கொள்ளத் தேவையில்லை. நமக்குத் தேவை ரஹானே மாதிரி  ஒரு பரிதாபமான ஜெயிக்க வாய்ப்பில்லாத ஆள், கருத்து சொன்ன மாதிரியும் ஆச்சு நமது நல்லியில்பை காட்டிக்கொண்டமாதிரியும் ஆச்சு.




அரசியல் ஆக்டிவிஸ்ட் ரிவியூ

அரசியல் தலைவர்கள் பிரபல வீரர்களுடன் நட்புடன் இருக்கலாம். ஆனால் அரசியல் ஆக்டிவிஸ்டுகளுக்கு அது ஆகாது. கடும் கோபத்துடன் யாரையாவது திட்டிக்கொண்டே இருப்பது தான் காலால்படையினரின் சீக்ரெட் ஆப் எனெர்ஜி.

இந்த ரிவியூ தான் ரெம்ப எளிது. நாம் சப்போர்ட் செய்யும் கட்சிக்கு ப்ளேயர்ஸ் சப்போர்ட் செய்து ட்வீட் போடல இல்லை, இந்த டீம் ஜெயக்க வாய்ப்பில்லை என சொல்லிட்டு போயுட்டே இருக்கலாம்.  பத்து இருபது வருடம் நாம் ரசித்த ஒரு ப்ளேயர் என்றாலும் அவரின் ஒரே அரசியல் நிலைப்பாடு பிடிக்கவில்லை என்றால் மொத்தமாக அவரை நிராகரிக்கும் மனம் வேண்டும். அதாவது க்ரிக்கெட் முதல் சினிமா வரை எதையும் தான் வேலைபார்க்கும் கட்சிக்கு ஓட்டு வருமா என்ற கண்ணோட்டத்திலேயே பார்க்கும் ஸ்பெஷல் கண்ணாடிதான் போட்டால் இந்த ஸ்டைல் ரிவியூ வரும். 

இந்த ஸ்டைல் சினிமா ரிவியூ இன்னொரு சமயம் பார்க்கலாம். எனக்கு தெரிந்த நண்பர் ஒருவர் டெனெட் படம் கதை புரியாவிட்டால் என்ன க்ரிஸ்டோபர் நோலன் எந்தக் கட்சிக்கு ஆதர்வு என்று தெரிந்தால் போதும், ஒரு ரிவியூ எழுதிவிடலாம் என கூகிள் செய்துகொண்டிருந்தது இப்போது நினைவுக்கு வருவதை தவிர்க்கமுடியவில்லை.


இந்த எல்லா ரிவியூவிலும் கவனிக்கவேண்டிய ஒரு விஷயம் இருக்கு. எல்லா ரிவியூவும் நம்ம டீம் எப்படியாவது ஜெயிக்கனும்னு ஆசைப்படுவது போல தோன்றும், ஆனால் உண்மையில் டீம் ஜெயித்தால் இந்த வகை ரிவியூக்கள் எதுவும் வருவதில்லை எனபதையும் கவனிக்கவேண்டும். டீம் ஜெயித்தால் டீமுக்கு வருமானம், அதற்கு ரிவியூ மனுஷன் சொல்வானா, அல்லது அதைத்தான் யாரும் கவனிப்பார்களா என அவர்கள் கேட்பதும் நியாயமான கேள்வி தான்.